Katibu Mkuu Wizara ya maji Profesa Jamal Katundu amefurahishwa na mradi wa ujenzi wa vituo vya kutoa huduma uliotekelezwa na Mamlaka ya Majisafi na Usafi wa Mazingira Dar es salaam (DAWASA) wenye lengo la kuboresha mazingira na kuzihasa Mamlaka za maji nchini kuiga mfano huo kwa DAWASA.

Profesa Katundu ameyasema hayo alipotembelea banda la elimu kwa umma la DAWASA katika Kongamano la kimataifa la kisayansi la maji lililoambatana na maadhimisho ya miaka 50 ya Chuo cha Maji.

"Nimeona mradi huu mzuri na bora kabisa, mradi uliolenga kuboresha usafi wa mazingira huu ni mfano wa kuigwa, na nitoe rai sasa kwa Mamlaka za maji nchini kuiga mfano huu toka DAWASA kwa kuja kujifunza na kutekeleza katika maeneo yao" ameeleza Profesa Katundu.

Akielezea utekelezaji wa mradi huo, Kaimu mkuu wa kitengo cha Mawasiliano DAWASA , Everlasting Lyaro amesema Mamlaka imejenga vituo vya umma 30 katika wilaya zote tano katika Mkoa wa Dar es salaam na katika maeneo yenye mkusanyiko wa watu kama vile Sokon, katika standi za magari ili kuwafikia wananchi wengi zaidi.

Kwa upande wake mkuu wa Chuo cha maji, Dkt.Adam Karia akiongea juu ya mafanikio ya miaka 50 ya chuo cha maji ameeleza kuwa chuo kimeweza kutengeneza wataalamu walio bora na wanaohudumu katika sekta ya maji Nchi nzima.

"Kwa miaka 50 hii, Chuo chetu kimetengeneza wataalamu wengi wanaofanya vizuri katika sekta ya maji na kuleta tija kubwa katika kuchangia ukuaji wa sekta hii muhimu kwa wananchi. Tunapoiangalia miaka 50 ijayo tunalenga kuwa chuo cha mfano na kutengeneza wataalamu wengi zaidi wenye viwango." ameeleza Dkt. Karia.

Kongamano la kisayansi la kimataifa la maji limefanyika kwa muda wa siku tatu na kukutanisha wadau wa sekta ya maji nchini kujadili tafiti zitakazoleta maendeleo katika sekta ya maji huku ikibeba kauli mbiu Maji na Usafi wa Mazingira katika ulimwengu unaobadilika.